වසර 27 කට පසු යුරෝපා රටවල වැසියන්ට පූර්ණ සූර්යග්රහණයක් දකින්න ලැබුණි. සූර්යග්රහණය ආරම්භ වූයේ ග්රීන්විච් වේලාවෙන් සවස 15:34 ටය.
රුසියාවේ උතුරු ප්රදේශවලට, ග්රීන්ලන්තයට, අයිස්ලන්තයට, ස්පාඤ්ඤයට සහ පෘතුගාලයේ ප්රදේශ කීපයක මිලියන 15 කට පූර්ණ සූර්යග්රහණය දකින්න ලැබුණි.
බටහිර යුරෝපයට, වයඹදිග අප්රිකාවට, කැනඩාවේ වැඩි කොටසකට සහ ඇමෙරිකා එක්සත් ජනපදයේ උතුරු ප්රදේශවලට මෙම සූර්යග්රහණය දකින්න ලැබුණේ අර්ධ සූර්යග්රහණයක් ලෙසය.
මිනිත්තු 2යි තත්පර 18 ක කාලයක් පූර්ණ සූර්යග්රහණය පැවැති අතර, අයිස්ලන්තයේ රෙයික්යවික් නුවරට එය හොඳින්ම දිස්විණි.
සූර්යග්රහණයක් යනු පෘථිවිය සහ සූර්යයා අතරින් චන්ද්රයා ගමන් කිරීමේදී, චන්ද්රයා විසින් සූර්යයා සම්පූර්ණයෙන් හෝ අර්ධ වශයෙන් ආවරණය කරමින් පෘථිවිය මතට සෙවනැල්ල පතිත වන ස්වාභාවික ආකාශ සංසිද්ධියයි.
මෙහිදී සූර්යයා, චන්ද්රයා සහ පෘථිවිය එකම සරල රේඛාවක පිහිටන අතර, චන්ද්රයාගේ සෙවනැල්ල වැටෙන පෘථිවි ප්රදේශවලට සූර්යාලෝකය තාවකාලිකව අවහිර වී දිවා කාලය අඳුරු වෙයි.
මෙම සූර්යග්රහණයේ විශේෂත්වය මීට පෙර කිසි දිනෙක නොදුටු, අනාගතයේදීද යළි දැකිය නොහැකි සූර්ය කොරෝනාවක් දකින්න ලැබීමය. සූර්ය කොරෝනාව යනු සූර්යයාගේ වායුගෝලයේ පිටතින්ම පිහිටි, අතිශය උණුසුම් වායු හා ප්ලාස්මා වලින් සමන්විත බාහිරම ස්තරයයි.
සාමාන්යයෙන් අධික හිරු එළිය නිසා සූර්යයාගෙන් කිලෝමීටර් මිලියන ගණනක් ඈතට විහිදෙන මෙම කොටස නොපෙනෙන නමුත්, පූර්ණ සූර්යග්රහණයකදී චන්ද්රයා සූර්යයා සම්පූර්ණයෙන් ආවරණය කිරීමත් සමඟ එය රිදී හෝ සුදු පැහැති කිරණ වළල්ලක් ලෙස අඳුරු අහසේ දිස්වෙයි.
සූර්යග්රහණය සිදුවෙද්දී බුධ, අඟහරු, බෘහස්පති, සෙනසුරු, යුරේනස් මෙන්ම නෙප්චූන් යන ග්රහලෝක හය අහසේ එකම රේඛාවක පෙළගැසී තිබීම ද විශේෂත්වයකි.
National Geography ඇසුරිනි
