කෘතිම බුද්ධිය එසේත් නැතිනම් AI දෛනික වැඩ කටයුතු පහසු කරන මෙවලමක් බවට පත් වී අවසන්ය. කෘත්රිම බුද්ධි මෙවලම් අප කාගේ කාගේත් ජීවිතවලට කොතරම් සමීප ද කියනවා නම්, පෞද්ගලික ප්රශ්න, රහස් සහ තොරතුරු පවා අප භාවිතයට ගන්නා AI සමග බෙදා ගනී.
අප අපගේ රෝගී තත්ත්වයන් ගැන විමසයි. ඖෂධ ගැන විමසයි. එපමණක් නොවෙයි; මනෝ විද්යාත්මක එසේත් නැතිනම් මානසික සෞඛ්ය උපදෙස් පවා ලබා ගැනීමට පෙළඹී සිටී.
කෘතිම බුද්ධිය (AI) හරහා මානසික සෞඛ්ය උපදෙස් ලබාගැනීමේ නව ප්රවණතාවය පිළිබඳව බ්රවුන් විශ්වවිද්යාලයේ පර්යේෂකයන් කණ්ඩායමක් විශේෂ අධ්යයනයක් සිදුකර ඇත.
එහිදී අනාවරණය වී ඇත්තේ ChatGPT වැනි පද්ධති පුහුණු උපදේශකයන් ලෙස පෙනී සිටීමට උත්සාහ කළ ද, වෘත්තීය මනෝ විද්යාත්මක සේවාවක තිබිය යුතු සදාචාරාත්මක ප්රමිතීන් ආරක්ෂා කිරීමට ඒවා අපොහොසත් වන බවය. බලපත්රලාභී මනෝවිද්යාඥයන් සමඟ සැසඳීමේදී, AI පද්ධතිවලට තැනට සුදුසු නිවැරදි උපදෙස ලබා දීම කළ නොහැකිය. ගැටලුව නිසි ලෙස කළමනාකරණය කිරීමට AI දන්නේ නැත.
එය ගැටලුව තවත් උත්සන්න කිරීමට හේතුවක් වෙයි. එය මානසික සෞඛ්ය උපදෙස් බලාපොරොත්තු වන තැනැත්තාගේ ජීවිතයට අනතුරක් වීමට පවා ඉඩ ඇත.
AI පද්ධතිවල නිර්මාණය කර ඇත්තේ ව්යාජ සංවේදීතාවක් (Deceptive Empathy) මවා පෑමටය.
AI පද්ධති ඉතා සහයෝගී සහ කරුණාවන්ත වචන භාවිතා කරමින් පුද්ගලයාගේ හැඟීම් තමන්ට වැටහෙන බව ඇඟවීම සිදුකරයි. යන්ත්රයකට මිනිස් හැඟීම් පිළිබඳ සැබෑ අවබෝධයක් නොමැති අතර, මෙම ව්යාජ ආකර්ෂණය නිසා මානසික සෞඛ්ය අපේක්ෂා කරන තැනැත්තා නොමග යැවීමක් සිදුවෙයි.
එබැවින්, මානසික සෞඛ්ය ක්ෂේත්රය තුළ AI භාවිතය සම්බන්ධයෙන් දැඩි නීති සහ මාර්ගෝපදේශ සකස් කිරීම අත්යවශ්ය බව බ්රවුන් විශ්වවිද්යාලයේ පර්යේෂකයෝ පවසති.
Live Science ඇසුරිනි
