රුසියාවේ සයිබීරියානු හිම තට්ටු (Permafrost) යට වසර 40,000කට ආසන්න කාලයක් මිදී සැඟවී නිහඬව සිටි පියවි ඇසට නොපෙනන, අන්වීක්ෂයකින් පමණක් දැකිය හැකි විලෝපික ජීවියෙකු යළි පණ ගැන්වීමට විද්යාඥයෝ සමත් වී සිටිති.
අඩි 30 ක් පමණ ගැඹුරු හිම යට සැඟවී සිටි මෙම ජීවියා ලෙට් ප්ලයිස්ටොසීන් (Late Pleistocene) යුගයට, එනම් ලොම් සහිත මැමත් ඇතුළු සතුන් පෘථිවියේ සැරිසැරූ කාලයට අයත් වන්නකි. ආක්ටික් රුසියාවේ යමාලෝ-නෙනෙට්ස් ප්රදේශයෙන් හමු වූ මෙම ක්ෂුද්ර ජීවියා, විද්යාඥයන්, Acanthocystis yamallongha ලෙස නම් කර ඇති අතර, එහි තේරුම පෘථිවියේ කෙළවර සැගවුණු ආත්මය යන්නය.
මිලිමීටරයකින් දහසකින් පංගුවකටත් වඩා සිහින් වූ කටු සහ කොරපොතු වලින් වැසුණු මෙම ජීවියා සෙන්ට්රොහෙලිඩ් (Centrohelid) නම් ඒක සෛලික ජීවී කාණ්ඩයට අයත් බව පැවැසෙයි. මෙම ජීවියා මෙතරම් දීර්ඝ කාලයක් සුරැකිව සිටියේ ක්රිප්ටෝබියෝසිස් (Cryptobiosis) නමැති විශේෂ තත්ත්වයක් හරහා යැයි ටියුමන් ප්රාන්ත විශ්වවිද්යාලයේ පර්යේෂකයෝ පැහැදිලි කරති.
මෙහිදී ජීවියාගේ පරිවෘත්තීය ක්රියා සම්පූර්ණයෙන්ම පාහේ නතර වී, ශරීරය වටා ආරක්ෂිත සිලිකා කටුවක් නිර්මාණය වන බැවින් දහස් ගණන් වසර නිරුපද්රිතව සිටීමට මින් අවස්ථාව ලැබී ඇත.
විද්යාඥයන් පවසන පරිදි මෙම සොයාගැනීම අතිශය වැදගත් වන්නේ, මෙවැනි ක්ෂුද්ර ජීවීන්ට අප සිතුවාට වඩා බොහෝ කාලයක් ජීවී තත්ත්වයේ රැඳී සිටිය හැකි බව මින් තහවුරු වන බැවිනි.
සයිබීරියාවේ හිම මිදුණු පොළොව ස්වභාවික ශීතකරණයක් ලෙස ක්රියා කරමින් මෙවැනි පුරාණ ජීවීන් රැසක් සුරක්ෂිතව තබාගෙන සිටින බව දැන් පැහැදිලි වී තිබේ. විශේෂම කරුණ වන්නේ, මෙම ජීවී පොසිලය මිනිසාට කිසිදු හානියක් නොකරන, රෝගකාරක නොවන සරල ජීවියෙකු වීමය.
Live Science ඇසුරිනි
