සාම පා ගමන 
2025 වසර අවසානයේ, පඤ්ඤාකාර හිමි ඇතුළු භික්ෂූන් වහන්සේලා 19 දෙනකු උන්වහන්සේලා වැඩවාසය කරන ටෙක්සාස් ජනපදයේ හුවොන්ග් ඩාවෝ විපස්සනා භාවනා මධ්යස්ථානයේ සිට වොෂින්ටන් ඩී.සී. දක්වා සැතපුම් 2,300 ක් දුර පා ගමනක නියැලුණු කතාව අමුතුවෙන් කිව යුතු නොවෙයි. ඇමෙරිකානුවන්ට බුදු දහමේ හරය පෙන්වා දිය හැකි ආකාරයට මෙය සාමයේ පා ගමන ලෙස නම් කෙරුණි. ආලෝකා ද ඊට එක් විය. පා ගමන සාම පා ගමන ලෙස නම් කෙරුණේ බෞද්ධ දර්ශනය ගැන කිසිදු පඅවබෝධයක් නොමැති ඇමෙරිකානුවන්ට පවා, සරලව අවබෝධයක් ලබා දීමය. සාම පා ගමනේ හරය “චරථ භික්ඛවෙ චාරිකං බහුජන හිතාය බහුජන සුඛාය ලෝකානුකම්පාය” යන බුදුරජාණන් වහන්සේගේ දේශනාව පදනම් කරගනිමින් කරුණාවේ සහ මෛත්රීයේ පණිවිඩය ප්රචලිත කිරීමය.
ඒහිපස්සිකෝ පා ගමන
අප රටේ පැවැත්වූයේ ඒහිපස්සිකෝ සාම පා ගමනයි. පඤ්ඤාකාර ස්වාමීන් වහන්සේ ප්රමුඛ සෙසු භික්ෂූන් වහන්සේලා වැඩම කරවීමටත්, ගුවන් මගින් ආලෝකා මෛහට ගෙන්වා ගැනීමටත් මැදිහත් වී කටයුතු කළේ පූජ්ය මෙල්පිටියේ විමලකිත්ති ස්වාමීන් වහන්සේය. බොහෝ දෙනාට ගැටලුවක් වූ කරුණ නම්, අපේ රටේ යුද්ධ නැහැ සාම පා ගමනක් පවත්වන්නේ ඇයි යනුවෙනි. සිතා බලන්න. සාමය යනු වෙන්වන් අර්ථ ගැන්වෙන්නේ ඔබ සහ මම ඇතුළු අප සියලු දෙනා තුළ සාමය වඩවා ගැනීමය. ගැටීමක් නොමැතිව ජීවත් වීමය. ගැටුම් නැතිනම්, එය ලෝක සාමය නොවේද? ලෝකවාසී ජනතාවට සාමයේ පණිවිඩය බෙදා හරිමින් සහ බුදු දහමේ උරුමය ජාත්යන්තරය වෙත රැගෙන යමින් දින 7 ක් පුරා පැවැති ඒහිපස්සිකෝ සාම පා පාගමනේ සමාප්ති රාජ්ය උත්සවය ජනාධිපති අනුර කුමාර දිසානායක මහතාගේ සහභාගිත්වයෙන් පැවැත්විණි.
ආපසු වැඩම කරති
ජය ශ්රී මහා බෝධි අංකුරයක් පඤ්ඤාකාර ස්වාමීන් වහන්සේට ලැබුණු අතර, උන් වහන්සේ ඇතුළු සෙසු භික්ෂූන් වහන්සේලා එය ටෙක්සාස් ජනපදයේ හුවොන්ග් ඩාවෝ විපස්සනා භාවනා මධ්යස්ථානයට වැඩම කිරීම සිදු කළහ. සාම පා පාගමනේ සමාප්ති රාජ්ය උත්සවය පැවැති අවස්ථාවේදී විශේෂ අනුශාසනාවක් සිදු කළ පූජ්ය මෙල්පිටියේ විමලකිත්ති ස්වාමීන් වහන්සේ සඳහන් කළේ අනාගතයේ කෙදිනක හෝ ඇමරිකාවේ බුදු දහම පිළිබඳ කතා කරන තැනක ලංකාවෙන් වැඩම කළ බෝධින් වහන්සේ සහ ධාතුන් වහන්සේ පිළිබඳ මෙම ඓතිහාසික අවස්ථාව සිහිපත් කරනු ඇති බවය. එය ශ්රී ලාංකික ජාතිය ලෙස ඇමරිකාවේ බුදු දහම පිළිබඳ ආඩම්බර විය හැකි ඓතිහාසික අවස්ථාවක් බවද උන්වහන්සේ වැඩි දුරටත් පෙන්වා දුන්හ.
ජගත් සංවිධානයේ උත්සවය
වෙසක් මංගල්යය නිමිත්තෙන් සංවිධානය කරන ලද 2026 ජාත්යන්තර වෙසක් දින සැමරුම වෙනුවෙන්, පඤ්ඤාකාර හිමියන් ප්රමුඛ එම භික්ෂූන් වහන්සේලා පසුගිය දා ටෙක්සාස් සිට නිව්යෝක් නුවරට වැඩම කළහ. ඒ, වෙසක් මංගල්යය නිමිත්තෙන් නිව්යෝක් නුවර එක්සත් ජාතීන්ගේ මූලස්ථානයේ පැවැති විශේෂ වැඩසටහනට සම්බන්ධ වීමටය. එක්සත් ජාතීන්ගේ මහා මණ්ඩලයේ 54/115 සම්මුතිය මගින් වෙසක් දිනය ජාත්යන්තර වශයෙන් පිළිගෙන වසර 27ක් සපිරීම නිමිත්තෙන් මෙම වැඩසටහන සංවිධානය කර තිබුණි. බුදුදහම හරහා ලොවට දායාද වූ සාමය කරුණාව සහ සහජීවනය වැනි විශ්වීය වටිනාකම් ජාත්යන්තර ප්රජාව වෙත නැවත වරක් සිහිපත් කරලීම ඇමෙරිකාවේ වැඩවසන වියට්නාම භික්ෂූන් වහන්සේ නමක වන පඤ්ඤාකාර හිමියන් ප්රධාන අරමුණ වෙයි.
පඤ්ඤාකාර හිමියෝ
පඤ්ඤාකාර හිමි එක්සත් ජාතීන්ගේ මූලස්ථානයේ දී විශේෂ දේශනයක් ද පැවැත්වීය. ඒ, අහිංසාව, අන්යෝන්ය අවබෝධය සහ බුදුදහමේ ඉගැන්වීම් අතිශය කාලීන මඟපෙන්වීමක් බව සිහිපත් කරමිණි. එක්සත් ජාතීන්ගේ සංවිධානය ශ්රී ලංකා සහ තායිලන්ත නිත්ය නියෝජිත කාර්යාල එක්ව සංවිධානය කළ මෙම සැමරුම ලෝක සාමය සහ තිරසාර සංවර්ධනය උදෙසා බෞද්ධ දර්ශනයෙන් ලැබෙන පිටුවහල විදහා දැක්වූ සුවිශේෂී අවස්ථාවක් ලෙස සැලකෙයි. මෙම වැඩසටහන සාර්ථක කර ගැනීම සඳහා රාජ්ය තාන්ත්රික මට්ටමින් මෙන්ම සිවිල් සංවිධාන මට්ටමින් ද බොහෝ දෙනෙක් සහභාගී වී සිටියහ.
