![](https://blogger.googleusercontent.com/img/b/R29vZ2xl/AVvXsEhnZW2VtchMxQ8ZWzofEJYSWSbSyRC8-pEmK-ZAzoZ6ZovQyJ9TPbg-GvbAo91QP2QIjkf37C_sLyMZiIhJu9FLr4ymd7z8f_C6xwe0hZviJ6jSbliO469M-8uz0-rUDQyG0WfgEPuW58gZ/s16000/190347064_1932261446939161_75183907597474886_n.jpg)
![](https://blogger.googleusercontent.com/img/b/R29vZ2xl/AVvXsEid_7vtNhDGmYlT1u_HBpV4VTlKGQBVVlOyxSJFDrKBnjaRV7lVu3tzN0rCgMh_18VgR0MeZTtworSu0fdPzdl05lHqdh2ph3tIE595Jbpk6PmaAY6nULUTBx1b6s-wjSl9gWEF837zui1p/s16000/199541308_1932261383605834_9119836271362067350_n.jpg)
පොළොන්නරුවේ ඉදිකෙරුණු චීන - ශ්රී ලංකා මිත්රත්ව ජාතික වෘක්කවේද විශේෂිත රෝහල අද (11) පෙරවරුවේ ජනාධිපති ගෝඨාභය රාජපක්ෂ මැතිතුමා අතින් ජනතා අයිතියට පත් කෙරිණ.
හිටපු ජනාධිපති මෛත්රීපාල සිරිසේන මහතා 2015 වසරේ චීනයේ සිදුකෙරුණු සංචාරයේ දී කළ ඉල්ලීමකට අනුව චීන රජයේ පූර්ණ ප්රදානයක් ලෙස රෝහල් සංකීර්ණය මෙරටට හිමි විය.
චීන සහ ශ්රී ලංකා පෞරාණික ගෘහ නිර්මාණ ශිල්පයට අනුව ඉදිකෙරුණු රෝහල් සංකීර්ණය අක්කර 16ක භූමි ප්රමාණයක විහිදී තිබේ. ඒ සඳහා වැය කෙරුණු මුදල රුපියල් කෝටි 1200ක් වන අතර ඉදිකිරීම් සඳහා ගතවු කාලය මාස 30කි.
වකුගඩු බද්ධ කිරීම සඳහා නවීන පහසුකම් සහිත ශල්යාගාර 05කින් යුත් මෙහි රෝගීන් 200 කට නේවාසික පහසුකම් සැපයේ. දැඩි සත්කාර ඇඳන් සංඛ්යාව 20කි.
![](https://blogger.googleusercontent.com/img/b/R29vZ2xl/AVvXsEixB9SLnAZU7yt-DqqlBxXzEOLIwgy2cxyuEv6u7KGoxqKP-dEZ6Yb_NTFHX8BdaYJnF7aWgV8bLAF1HhAKLC8q7zuzAPcG2AHmxlGa-qBzCmZar3UYwhFzprhMteAH8UEJgiC1dCaeoQZ0/s16000/193269021_1932261563605816_7911269293113614422_n.jpg)
![](https://blogger.googleusercontent.com/img/b/R29vZ2xl/AVvXsEhW1hTWVTg9NFezfn5FAXzmniZRY0_AdnzZZ4U66xW1hkH6HGAz2PfQ-HJchbM5bLaLYnLQWWFyZ0nVyIri5-MaPKRZkAKTBmTxwF8muW3ypaqiDrFxd4Mo4voFKVaZGmU4LDYhSHoI9XNX/s16000/195262006_1932261603605812_8012929722702015981_n.jpg)
යන්ත්ර 100කින් සමන්විත රුධිර කාන්දුකරණ ඒකකයක්, වකුගඩු රෝගී සායන සංකීර්ණයක්, අති නවීන තාක්ෂණයෙන් යුත් රසායනාගාර හා පර්යේෂණාගාර, විකිරණ සහ සී.ටී ස්කෑන් සේවාව සහ නවීන ශ්රවණාගාරයක් මීට අයත්ය.
වාහන 300ක් නවතා තැබිය හැකි රථ ගාලක් සහ රෝහල් කාර්ය මණ්ඩලයේ සෑම අයෙකුටම නේවාසිකාගාර පහසුකම් සැලසුම් කර තිබීම විශේෂත්වයකි.
ජනාධිපති ගෝඨාභය රාජපක්ෂ මැතිතුමා විසින් සමරු ඵලකය නිරාවරණය කර රෝහල් සංකීර්ණය විවෘත කෙරිණ.
රෝහලේ කාර්යභාරය පිළිබඳව පොළොන්නරුව මහා රෝහලේ අධ්යක්ෂ විශේෂඥ වෛද්ය එම්.කේ. සම්පත් ඉන්දික කුමාර මහතා විස්තර කළේය.
ජනාධිපතිතුමා ඇතුළු ආරාධිත පිරිස රුධිර කාන්දුකරණ ඒකකය, ශල්යාගාරය, දැඩි සත්කාර ඒකකය ඇතුළු රෝහල් සංකීර්ණය නිරීක්ෂණය කළහ.
![](https://blogger.googleusercontent.com/img/b/R29vZ2xl/AVvXsEiiE0WRab9FZ2JBg-yGxRZKriG8zCkpTK2Oguoe2kQ0FB4Ajb-AJv1QYDQ_hzo2sBc_jgeW2E9by2jhdJgvsNJ7h0Tkil7EYiduDoF-kDV5obL-lBadHRSR-EiA55VaztUbU1eThm0DChr5/s16000/192587247_1932261390272500_4112973271183142165_n.jpg)
![](https://blogger.googleusercontent.com/img/b/R29vZ2xl/AVvXsEjutPyt2XbKfx6rIiN3NEqxSG0tlV0D4JuN_yHFWGN3Uuzt7WtLf_5Jf3zivtqIyhEeN-aUXqg3JA9_I4UyA8EGCwKr11tPhaTfr5I3z9KHBhzcv9xuXcMcvLJC2mbzKyYEohnxy735dYO3/s16000/194885011_1932261556939150_265915059115076439_n.jpg)
හිටපු ජනාධිපති මෛත්රීපාල සිරිසේන, සෞඛ්ය අමාත්ය පවිත්රා වන්නිආරච්චි, උතුරු මැද පළාත් ආණ්ඩුකාර මහීපාල හේරත්, රාජ්ය අමාත්යවරු වන සුදර්ශනී ප්රනාන්දුපුල්ලේ, චන්න ජයසුමන, රොෂාන් රණසිංහ, සිරිපාල ගම්ලත්, පාර්ලිමේන්තු මන්ත්රීවරුන් වන අමරකීර්ති අතුකෝරල, සුරේන් රාඝවන්, ජනාධිපති ප්රධාන උපදේශක ලලිත් වීරතුංග, සෞඛ්ය අමාත්යාංශ ලේකම් විශ්රාමික මේජර් ජෙනරාල් සංජීව මුණසිංහ, සෞඛ්ය සේවා අධ්යක්ෂ ජනරාල් වෛද්ය අසේල ගුණවර්ධන, ශ්රී ලංකාවේ චීන තානාපති චී. චෙන්ග් හොන්ග් යන මහත්ම මහත්මීහු ඇතුළු පිරිසක් මේ අවස්ථාවට එක්ව සිටියහ.
ජනපති මාධ්ය අංශය