එන්නත් ගන්නා අයට මර්ජුවානා නොමිලේ - මවිත : Mawitha.com : All the latest Sri Lanka and world breaking news and current affairs in Sinhala

Hot

Stay Safe

Katayam.com

Jun 9, 2021

එන්නත් ගන්නා අයට මර්ජුවානා නොමිලේ

'කොවිඩ් 19' වයිරසයෙන් ආරක්ෂා වීමට, ප්‍රතිශක්තිකරණ එන්නත් ලබා ගන්නා අවුරුදු 21 ට වැඩි ඕනෑම අයකුට නොමිලේ මර්ජුවානා (ගංජා-කංසා වැනි) ලබාදීමට ඇමෙරිකාවේ වොෂින්ටන් ජනපද බලධාරීන් තීරණය කර තිබේ. ඒ, එන්නත් ලබා ගැනීමට අදිමදි කරන ඇමෙරිකානුවන් දිරි ගැන්වීමක් ලෙසය. 

'ජොයින්ට්ස් ෆෝ ජැබ්ස්' joints for jabs යනුවෙන් මෙම වැඩසටහන නම් කර තිබේ. ඖෂධීය ගුණය සැලකිල්ලට ගනිමින්, ඇමෙරිකාවේ ප්‍රාන්ත බොහොමයක ඔසුහල් මගින් මර්ජුවානා විකිණීම සිදු කෙරේ. 

වොෂින්ටනයේ එන්නත් ලබා ගන්නා අවුරුදු 21 ට වැඩි ඇමෙරිකානුවන්ට මර්ජුවානා ලබා දීම එම ඔසුහල් සම්බන්ධ කර ගනිමින් සිදු කරන බව වොෂින්ටන් බලධාරීන් පවසා ඇත. 

ඇමෙරිකාවේ වැඩිහිටි ජනගහනයෙන් වැඩි පිරිසක් මේ වනවිට ප්‍රතිශක්තිකරණ එන්නත්වලින් එක් මාත්‍රාවක් හෝ ලබා දී ඇති බව සෞඛ්‍ය බලධාරීන් පවසයි. වොෂින්ටන් ජනපදයේ එන්නත් එකක් හෝ ලබා ගත් ප්‍රතිශතය සියයට 54 ක් පමණි. 

 ජූලි 4 වැනිදා ඇමෙරිකාව නිදහස් දිනය සමරද්දී, රටේ සමස්ත ජනගහනයෙන් සියයට 70 කට වඩා වැඩි පිරිසක් එන්නත් කිරීම ජනාධපති ජෝ බයිඩන්ගේ ඉලක්කය වී තිබේ. මේ වනවිට අවුරුදු 12 ට වැඩි සියලු දෙනාට එන්නත් ලබා දෙයි. 

'ෆයිසර්' සහ 'මොඩර්නා' යනු එසේ ලබා දෙන ප්‍රතිශක්තිකරණ එන්නත්ය. 12 ත් 15 ත් වයස් කාණ්ඩයේ දරුවන්ට ලැබෙන්නේ 'ෆයිසර්' එන්නත පමණි. ඇමෙරිකාවේ කොරෝනා ව්‍යාප්තිය පාලනය වී ඇත්තේ එම එන්නත්කරණ වැඩසටහන සාර්ථක බැවිනි. 

ඒ අනුව, සෞඛ්‍ය බලධාරීන් පනවා ඇති තහංචි බොහොමයක් ද ලිහිල් වී ඇතැයි ඇමෙරිකන් පුවත් සේවා වාර්තා කරයි. ජනාධිපති ජෝ බයිඩන් පවසන අන්දමට ඇමෙරිකාවේ ආර්ථිකය ද යළි ශක්තිමත් වීමට පටන්ගෙන ඇත. 

'කොවිඩ් 19' වයිරසයෙන් ආරක්ෂා වීමට නම්, එන්නත් ලබා ගැනීම අනිවාර්යයෙන්ම කළ යුතු බව ජනාධිපති බයිඩන් ඇමෙරිකානුවන්ට දිගින් දිගටම පවසා ඇත. කෙසේ නමුත් එන්නත් ලබා ගැනීමට අදිමදි කරන පිරිසක් ද වෙති. ඔවුන්ගෙන් වැඩි දෙනා කළු ජාතික ඇමෙරිකනුවන්ය. 

එන්නත් ලබා ගැනීමට අදිමදි කරන බොහෝ දෙනාගේ විශ්වාසය වී ඇත්තේ, එන්නත හරහා සිරුරට පියවි ඇසට නොපෙනෙන පරිගණක චිපයක් ඇතුළු කරන බවය. එම චිපය හරහා රජය සහ බලවත් සමාගම් තමන් පාලනය කරනු ඇතැයි ද එම පිරිස පවසති. මීට අමතරව, ඇමෙරිකානුවන් එන්නත් කිරීමට උනන්දු කරවමින්, ඇමෙරිකාවේ ජනපද මට්ටමින් විවිධ වැඩසටහන් ක්‍රියාත්මක වෙයි. 

කැලිෆෝනියා සහ ඔහියෝ ජනපදවල එන්නත් ලබා ගන්නා අය වෙනුවෙන් ලොතරැයි ක්‍රමයක් හඳුන්වා දී ඇත. ඊට අමතරව, එන්නත් ලබා ගන්නා ඇමෙරිකානුවන් නොමිලේ ගුවන් ටිකට්පත් ලබා දීමක් ද ආරම්භ වී ඇත. ඒ, අභ්‍යන්තර ගුවන් ගමන් සඳහාය.

ඇමෙරිකාවේ සෙසු ජනපදවල නොමිලේ බියර් ලබාදීම, ක්‍රීඩා තරඟ සහ සංගීත සංදර්ශනවල ටිකට්පත් නොමිලේ ලබා දීම, එම ක්‍රීඩා තරඟ සහ සංගීත සංදර්ශන නැරැඹීමට පැමිණෙන අයට නොමිලේ කඩචෝරු ලබා දීම ආදිය ද සිදු වෙයි.

CNN

No comments:

Post a Comment

Stay Safe

Stay_Safe Free_Ad